Hangyo sa Assumption Village konsiderahon sa public works

Hatagan sa pagtagad sa komite sa public works sa konseho ni konsehal Zaldy Ocon ang problema nga gipaabot sa mga residente sa Assumption Village Subdivision, Zone 13, Patag kalabot sa kalayo sa ruta sa ilang pampublikong sakyanan paingon sa Silver Creek Subdivision.


Matod pa nga ang maong ruta moagi sa Carmen ug Divisoria ug moagi pa sa Canitoan libot paingon sa Scions Home ayha pa sa Silver Creek Subdivision.

Sa ilang sulat ngadto sa komite ni Ocon, sila mipasabot nga langan kayo ang ilang byahe sa maong destinasyon hinungdan nga sila mihangyo nga mapamubo ang ruta sa mga pamsaherong sakyanan nga nagbyahi sa ilang dapit.


Si Romulo Ambay kinsa nagrepresentar sa mga residente miingon nga gusto nila ang hamubo lang nga ruta gikan sa Assumption Village paingon sa Silver Creek Canitoan Road ug sila misugyot nga aduna untay mas mubo nga connecting road paingon sa maong dapit aron maminusan ang matag adlaw nila nga pagbyahian. (Yonggals)