Bag-ong ruta sa sakyanan gihangyo sa konseho sa Puerto

Gipasalig ni konsehal Teodulfo Lao Jr., chairman sa komite sa public utilities, nga andam silang moabag sa hangyo ni barangay chairman Christian Achas sa barangay Puerto.

Kini kabahin sa pag-abli og bag-ong ruta alang sa ilang pampublikong sakyanan nga nagbyahi gikan sa Puerto paingon sa Alae.

Gipasabot ni kapitan Achas nga ang ilang gihangyo nga bag-ong ruta alang kini sa seguridad sa katawhan aron maminusan ang disgrasya sa kadalanan.

Dugang ni kapitan achas nga nabalaka sila sa ilang naandan nga rota gumikan kay daghan ang gaagi lakip na niini ang mga dagkong sakyanan .

Nunot niiini, gipasalig ni konsehal Lao nga ilang himoon ang tanan aron mahatagan sa panugot sa LTFRB kon Land Transportation Franchising Regulatory Board ni Director Aminoden Guro ug Roads and Traffic Administration ni Atty. Egay Uy ingon man ang paghangyo sa konseho sa barangay Puerto tungod kay nakita nga alang kini sa seguridad sa katawhan.

Apan gipasabot ni Lao nga maghulat sa una sila human matibawas sa RTA ang paghimo pag-usab sa Transport Road Plan sa bag-ong proyekto nga Coastal Road sa syudad. (Yonggals)