P83M gigahin alang sa dugang benepisyo sa taga-City Hall

Kapin sa P83 milyones ang giuyonan sa konseho sa syudad ubos ni bise mayor Kikang Uy alang sa dugang benepisyo sa mga opisyal ug kawani sa City Hall.

Sa sesyon niadtong Lunes hiniusang gipalabang ang Ordinance No. 13339-2017 nga nag-aprobar sa Supplemental Budget No. 5 sa General Fund nga adunay gibanabanang kinitaan nga mobalor og P71.45 milyones ug Supplemental Budget No. 2 sa Local Economic Enterprises sa tuig 2017 nga adunay gibanabanang kinitaan balor P12 milyones kapin.

Unod sa maong duha ka SB ang pagtunol sa Personnel Motivation Incentives (PMI) balor tagsa ka bulan nga suhulan sa tanang opisyal ug kawani sa City Hall.

Niini, si bise mayor Kikang Uy malaumon nga magamit sa mga kawani alang sa ilang mga pamilya ang madawat nga benepisyo alang sa mabolukon nga pagsaulog sa umaabot pasko.