Gan miawhag masusi drainage system diha sa Coastal Road

Nanawagan si konsehal Leon Gan sa kadagkoan sa Department of Environment and Natural Resources (DENR) nga susihon ang ilang proyekto nga Coastal Road sa syudad. Kini human namatikdan nga dili igo sa bul-og sa tubig ang drainage padahili sa dagat nga makaapekto sa mga molopyo sa dapit pag-apaw sa tubig.

Kini ang unod sa iyang special report atol sa sesyon sa konseho niadtong Lunes nga gidumala ni bise mayor Kikang Uy.

Matod ni Gan gikinahanglang subling matun-an ang drainage system sa bag-ong giablihang coastal road dinha sa Lapasan paingon sa Gusa.

Gibutyag sa konsehal ang iyang nadawat nga mulo gikan sa mga residente nga nabalaka panahon nga mag-ulan tungod kay seguradong moapaw gayud ang tubig.

Naghangyo si Gan sa mga hintungdang ahensya nga paspasan nila paghuman ang ilang mga proyekto aron dayon matutukan nila ang drainage system.

Lakip sa gihangyo ni Gan nga mahatagan sa pagtagad sa DPWH mao ang mga streetlights sa barangay Kauswagan paingon sa Opol Misamis Oriental nga matud pa adunay pagkangitngit ug gihangyo niini nga masuta aron malikayan ang disgrasya sa mga lumalabay nga sakyanan.

Ang maong taho ni Gan giduso ni bise mayor Kikang Uy ngadto sa komite sa public utilities ni konsehal Teodulfo Lao Jr. alang sa dugang pagtuon ug rekomendasyon. (El Kapitan)