P3.43M gigahin sa konseho pagpalambo sa Balubal FMR

Kapin sa P3.43 milyones ang gigahin sa konseho sa syudad aron mapatuman ang proyekto pagpalambo sa Farm to Market Road (FMR) dinha sa Barangay Balubal.

Sa sesyon sa konseho kagahapon nga gidumala ni bise mayor Kikang Uy, hiniusang giuyonan ang pagpalabang sa ordinansa nga naggahin sa nahisgotang kantidad gikan sa item “Special Program/Projects -Upgrading/Concreting of Farm to Market Road (LGU Equity)” sa 2017 Annual Bduegt sa city Agricultural Productivity Office (APO).

Ang maong gahin isip 20% paatbang pundo sa dakbayan sa gisugyot nga Development of Barangay Balubal (Purok 1) paingon ngadto sa Sitio Lagilay Access Road.

Si konsehal Edna Dahino, chairman sa komite sa panalapi ug usa sa nagpaluyo sa gipalabang nga ordinansa mibutyag nga ang proyekto ubos sa DENR -Integrated Natural Resources and Environment Management Project (INREMP) nga naglangkob sa pagtukod sa Spillway Crossing Agusan River, pagsemento sa dalan nga adunay drainage gikan sa Putok 1 paingon na sa Spillway ug pagsemento sa Foor Trails dinha sa Sitio Lagilay.

Ang ordinansa gipaluyohan usab sa komite sa public works ni konsehal Zaldy Ocon ug komite sa pamalaod ni konsehal Ian Mark Nacaya.