Hangyo sa Citihomes H’owners Transport Assn giaksyonan

Paningkamotan sa komite sa public utilities ni Teodulfo Lao Jr. ang hangyo sa Pag-ibig Citihomes Homeowners Transport Association pinaagi sa ilang presidente nga si Resurrection Chan nga mahatagan sila sa permit ug ruta sa ilang transportation gikan sa Citihomes Malawang Opol Misamis Oriental paingon sa Gaisano Mall ug uban nga shopping centers dinhi sa syudad.

Atol sa tigom sa komite niadtong Biernes, gibutyag ni Chan nga gikan sa tuig 2009 sa ilang pagpanimuyo sa dapit walay insaktong sakyanang pampubliko ang ilang dapit ug gani hangtod karon tulo ka sakay ang ilang giantos.

Dugang pa ni Chan nga mahadlok sila og sakay sa motor nga gitawag og habal habal tungod kay nasayod sila nga wala kiniy insurance ug kun mahitabo ang disgrasya makaloluoy ang pasahero.

Lakip sa gihangyo sa mga residente nga mahatagan sila sa panugot nga adunay tulo ka unit sa van nga maoy mamasahero sa ilang dapit. Samtang gitin-aw ni Atty. Egay Uy, oversser sa Roads and Traffic Administration (RTA) nga dili sila makahatag sa ruta diin asa usab sila mag-terminal kay kamulo pa ang panghimo sa transport road plan tungod sa bag-ong pag abli sa coastal road.

Nunot niini gipasalig ni konsehal Bong Lao nga tabangan silang mga residente labina ang paghatag og insaktong transportasyon apan gihangyo lang niini nga hulaton kun matibawas sa RTA ang gihimong Transport Road Plan. (El Kapitan)