Kaso batok kapitan sa Consolacion konsiderahon sa kom sa Blue Ribbon

Gihatagan og napulo ka adlaw sa komite sa blue ribbon ni konsehal Lordan Suan ang kampo ni Barangay Chairman Dante Roa sa barangay Consolacion nga ma-review ang kaso.

Kini human mihangyo sa komite si Atty. Titos Neri, abogado ni Roa nga mabasa niya ang unod sa kaso sa iyang kliyente aron kini matun-an.

Mahinumduman nga nagpasaka og kaso sa blue ribbon si Wensceslao Mingo, presidente sa Sand and Gravel Operators Association batok ni kapitan Roa ug Gregoria Sagosoy, barangay appointed checker alang sa kasong Grave Abuse of Authority.

Niini, si Suan misugyot ngadto sa nanumbong sa pagkuha og abogado aron maoy modepensa kaniya. Gitambagan usab siya ni Suan kun dili niya kaya magkuha sa pribadong abogado pwede siyang moduol sa Public Attorneys Office o’ sa Integrated Bar of the Philippines (IBP) nga andam mohatag og libreng serbisyo legal.

Malaumon si Suan nga makabaton og mga abogado ang matag panig aron masugdan sa komite ang pagdungog sa kaso. (El Kapitan)