Di maayong serbisyo sa CATV providers sa CdeO gireklamo

Dako ang akong kadismaya sa nagpadayong dili maayong serbisyo sa Cable TV providers dinhi sa dakbayan sa Cagayan de Oro.


Mao kini ang iyang gitaho ni konsehal Reuben Daba atol sa sesyon sa konseho niadtong Lunes nga gidumala ni bise mayor Kikang Uy.


Sakit kaayo ang akong kasingkasing sa pagsulti niini apan wala gayud mag-improve ang serbisyo sa atong cable providers. Dali ra kaayo moputol kun dili dayon mabayran, ug kun madaut, ingnon ka lang dayon og “reboot” pamahayag sa konsehal.


Siya midugang nga dako na gani ang bayad, gamay ra ang channels. Ang nakapait pa gayud ana tungod kay sila ra gayud ang operator dinhi sa syudad. Gitumbok sa konsehal ang Parasat Cable TV nga mao usab ang operator sa Jade Cable TV.


Niini, siya misugyot nga unta matun-an ang pagpasulod og laing cable providers dinhi sa dakbayan.

Tungod kay walay laing provider, mapugos gayud ang tawo pagdawat sa ilang serbisyo apan dili usab kini maayo, panapos sa konsehal.

Ang maong taho ni Daba giduso ni bise mayor Kikang Uy ngadto sa komite sa public utilities ni konsehal Bong Lao alang sa makuting pagtuon ug rekomendasyon.