Kikang mipasalamat sa tanang miabag aron magmalinawon ang kalag-kalag

Dako ang pasalamat ug pagdayeg ni bise mayor Kikang Uy sa tanang miabag aron magpabiling malinawon ang paghinumdum sa tanang Kagay-anon sa adlaw sa mga patay.

Atong nakita ang kahapsay sa trapiko dinha sa mga dalan pasulod ug pagawas sa tanang menteryo, publiko man o’ pribado nga nakahatag og kasayon sa tanan pagbisita sa ilang mga mitaliwang minahal sa kinabuhi, pamahayag sa bise mayor.

Lakip sa iyang gidayeg ug gipasalamatan sa bise mayor mao ang kwerpo sa kapolisan nga nagtukaw gayud 24 oras aron mamintinar ang kahusay ug kalinaw, ang mga sakop sa Roads and Traffic Administration (RTA), lain laing sektor ug pundok sa katilingban, mga opisyal sa barangay diin nahimutang ang mga menteryo, mga sakop sa City Disaster Risk Reduction and Management Office, City Health Department ug tanang boluntaryong mitunol sa ilang serbisyo alang sa katawhan sa dakbayan.

Kun kanunay kitang maghiusa dinha sa pagserbisyo sa katawhan, ato gayud nga maangkon ang kahusay ug kalinaw ug mapaabot ang tiunay nga serbisyo sa tanan, panapos ni bise mayor Kikang Uy.