Water system dihas Zones 6, 9 Upper Cugman mapalambo

Daling giaksyonan sa konseho sa syudad ubos ni bise mayor Kikang Uy ang pagpatuman sa proyekto pagpalambo sa sistema sa panubig dinha sa Upper Cugman.

Sa sesyon sa konseho niadtong Mierkoles nga gidumala ni presiding officer protempore konsehal Zaldy Ocon, hiniusang gipalabang ang Ordinance No. 13312-2017 nga naghatag og katungod ni mayor Oscar Moreno pagpirma sa Memorandum of Agreement (MoA) tali sa Cagayan de Oro Water District (COWD) ug Water Works Association.

Kini naglangkob sa rehabilitasyon sa kasamtangang deep well dinha sa Zone 9 ug Zone 6 sa Ilaya, upper Cugman.

Si konsehal Bong Lao, chairman sa komite sa public utilities ug nagpaluyo sa maong lakang mibutyag nga gikinahanglan kaayo sa mga molopyo sa dapit ang labing daling pagpatuman sa proyekto tungod kay ang panubig usa sa mga batakang panginahanglan sa inadlaw adlaw nga pagpakabuhi.

Ang pundo sa proyekto nga mobalor og P342 mil kapin kuhaon gikan sa P6 milyones nga pundo nga gi-alokar sa COWD alang sa matumbok nga proyekto sa lokal nga kagamhanan kalabot sa panubig.

Ang ordinansa nga gipalabang sa alang sa maong katuyoan gipaluyohan usab sa komite sa pamalaod ni konsehal Ian Mark Nacaya.