Daba nangusog matunol sa daling panahon benepisyo sa mga hamtong

Hugot nga gisuportahan sa komite sa katilingbanong serbisyo ni konsehal Reuben Daba ang sugyot sa kadagkoan sa buhatan sa City Social Welfare and Development (CSWD) nga madugangan og kawani ang ilang buhatan aron mapadali ang pagproseso sa social pension sa mga sakop sa Senior Citizens sa syudad.

Kini human ang kadagkoan sa maong buhatan sa milabayng tigom sa komite mipaabot sa ilang mulo kabahin sa kakulangon sa personahe sa buhatan nga nadestino diha sa pagproseso sa benefisyo sa mga hamtong.

Matod nila nga dili mokulang sa 16 ka mga personahe ang gikinahanglan nga i-hire aron mapadali ang pagproseso sa social pension ug matunol sa benefisyo ngadto sa mga hamtong sa daling panahon. Ilang gibutyag nga sa kasamtangan aduna lang upat ka mga kawani nga nagproseso niini.

Si konsehal Daba mipasalig nga iyang suportahan ang maong lakang pagdugang sa mga kawani aron masolosyunan ang problema nga gipaabot sa mga hamtong sa kalangan sa pagtunol sa ilang mga benefisyo. (JRG)