Gan nahingawa nga nalakip CdeO sa shamelist sa DSWD

Shamelist! Makauulaw.

Mao kini ang unod sa special report ni konsehal Leon Gan sa sesyon sa konseho niadtong Lunes nga gidumala ni bise mayor Kikang Uy.

Matod ni Gan nga base sa taho sa Department of Social Welfare and Development (DSWD), usa ang dakbayan sa Cagayan de Oro nga anaa sa Top 10 sa shamelist.

Nagtuo si Gan nga usa sa mga hinungdan niini mao ang mga unliquidated funds sa CSWD sa mga pundo gitunol gikan sa DSWD pabor sa kagamhanan sa dakbayan nga naglakip sa pagpatuman sa Early Childhood Development Program sama sa Supplementary Feeding sa kabataan.

Gihangyo ni konsehal Gan ang konseho nga mohimo og mga imbestigasyon kalabot niini aron masayran ang kakulangon sa CSWD.

Nunot niini, giduso ni bise mayor Uy sa komite sa social services ni konsehal Reuben Daba ang pagpahigayon og pakisusi sa maong butang.

Niini, si Daba nagdapit ni konsehal Gan nga motambong sa tigom sa komite ugmang adlawa aron mahatagan sa katin-awan ang maong isyu. (El Kapitan)