Kikang mi-abi abi sa DC teachers sa Bislig City

Mainitong gidawat ni bise mayor Kikang Uy ang 63 ka mga Day Care Teachers (DCTs) sa Bislig City nga mibisita dinhi sa dakbayan kagahapong adlawa.

Ang pagbisita sa mga DCTs gipangunahan sa ilang cluster heads nga naglangkob nila ni Jocelyn Agopitac, Cluster 4 ug presidente sa pederasyon sa DCTs uban nila ni Luzviminda Laspa, Cluster 1 Head; Elizabeth Lado, Cluster 2 Head; Jamila Panonte, Cluster 3 Head; Chona Dumaran, Cluster 4 Head ug Pelagia Lagura, Cluster 5 Head.

Ang pundok mibisita dinhi sa dakbayan aron pag-obserbar sa pagpadagan sa Early Childhood Development Program sa Cagayan de Oro tungod kay ang mga DCTs niini gibansay bansay sa Xavier University ug uban niini nabansay sa UNICEF.

Nasayran nga ang pagbisita sa taga-Bislig gipasiugdahan sa Supervised Neighborhood Play (SNP) in the Philippines ubos sa ChildFund International.

Niini, si bise mayor Uy malaumon nga daghan ang makat-onan sa mga DCTs sa Bislig City gikan dinhi sa kagamhanan sa dakbayan sa Cagayan de Oro nga ilang magamit aron mapalambo ang pamaagi sa pagtudlo sa kabataan sa ilang syudad.

Siya mapasigarbuhong mibutyag nga ang dakbayan sa Cagayan de Oro maoy nakakuha sa unang pwesto sa Seal of Local Good Education Governance sa tibouk nasud sa kategorya sa Highly Urbanized Cities.