P2.8M igahin isip bayad sa loteng naigo sa Ketkai Road Extn

Padayong nga gitun-an sa komite sa Finance, Budget & Appropriations ni konsehal Edna Marban-Dahino ang hangyo nga mabayran ang lote nga gipanag-iyahan ni Dr. Jesus Serina nga naapektohan sa gilarawng pag-abli sa Limketkai Road Extension.
Ang proyekto pag-abli sa maong dalan gikan sa Justo Ramonal St. paingon sa J.R. Borja Extension nga nahimotang sa Barangay 35, ning syudad.
Ang gahin nga gihangyo mobalor og P2.86 milyones kapin. Nasayran gikan sa Local Finance Committee (LFC) nga anaa na ang gikinahanglang gahin ug ang maong lakang aduna nay na-isyung Certificate of Availability of Funds (CAF).
Sa milabayng tigom sa komite, si konsehal Dahino namahayag nga dako siyang uyon nga ang maong balayronon sa dakbayan matunol na sa daling panahon apan kinahanglan usab nga ang mga dokumento kompleto ug nagsubay sa tukma nga proseso aron malikayan ang mga problema sa umaabot nga panahon. (APD)