CdeO, DOST-10 moinstalar og early warning system sa Bitan-ag Creek

Padayon ang konseho sa syudad ubos ni bise mayor Kikang Uy sa pagpatuman sa mga lakang pagpakgang sa mga panghitabo sa kalamidad sa bisan asang dapit sa dakbayan.

Sa sesyon sa konseho kagahapon, hiniusang gipalabang ang ordinansa nga naghatag og katungod ni mayor Oscar Moreno pagpirma sa Memorandum of Understanding (MoU) tali sa Department of Science and Technology (DOST-10) nga naglangkob sa pagpatuman sa proyektong Deployment of Early Warning System (DEWS) sa mga flood-prone areas.

Ubos sa maong MoU, ang DOST maoy mo-instalar og weather monitoring equipment nga naglakip sa duha ka unit nga Automated Rain Gauge (ARG) ug usa ka unit nga Water Level Monitoring System (WLMS).

Nasayran nga ang buhatan sa ikaduhang distrito sa dakbayan sa Cagayan de Oro mihangyo sa DOST-PAGASA pag-instalar og hydromet stations dinha sa Bitan-ag Creek.

Si konsehal Zaldy Ocon, chairman sa komite sa environment and natural resources ug nagpaluyo sa ordinansa mibutyag nga, ang DOST maoy mopatuman sa proyekto sa pakigtambayayong sa kagamhanan sa dakbayan sa Cagayan de Oro pinaagi sa pag-provide sa gikihanglang luna diin ipahimutang ang nahisgotang monitoring stations nga walay gasto sa dakbayan.

Hinuon, ang dakbayan gitahasan sa pag-provide og labor augmentation alang sa pag-instalar sa maong monitoring station, manpower, security fence ug pole mast alang sa kapaseguroan sa ekipo ug mamahimong caretaker sa ekipo ug mohatag sa regular nga taho ngadto sa DOST kalabot sa mga damyos nga mahitabo sa ekipo.

Ang ordinansa nga gipalabang sa konseho gipaluyohan sa komite sa environment and natural resources ni konsehal Zaldy Ocon ug komite sa pamalaod ni konsehal Ian Mark Nacaya.