Urban Poor Residents sa Brgy 30 mihangyong marelokar

Konsiderahon sa komite sa urban poor sa konseho ubos ni konsehal Zaldy Ocon ang sulat nga gipadangat sa mga sakop sa Urban Poor Residents of Barangay 30.

Kini hugot nga naghangyo sa komite ni Ocon nga mahatagan sila og relokasyon o’ kabalhinan sa ilang tagsa tagsa ka panimalay tungod kay ang kasamtangan nilang gipuy-an gipanag-iyahan kini sa pribadong pamilya.

Matod nila nga 23 ka tuig na sila nagpuyo sa maong dapit apan ang tag-iya sa lote nagpahibalo kanila nga gamiton na ang maong lote ug kinahanglan na nila kini nga hawaan.

Gipasabot usab nila nga halos mga kabos ang tanang nagpuyo sa dapit ug wala gayud lain nga kapuy-an kun ugaling mopahawa na sila sa dapit hinungdan nga sila midangop sa komite ni Ocon nga matabangan nga mahatagan og relokasyon sa ingon nga makabaton sila og kabalhinan aron adunay seguridad ang pagpuyo sa ilang mga pamilya. (Yonggals)