Suholan sa kanhi kawani sa City Hall matunol na

Paborableng girekomendar sa komite sa panalapi ni konsehal Edna Dahino ang pagbayad sa suholan ni Flora Lopez, kanhi job order sa buhatan sa Chief Executive Department.

Sa tigom sa komite kagahapon, si Dahino mipadayag sa iyang pag-uyon sa lakang nga matunol na ang benepisyo sa maong kawani nga nagkantidad lamang sa P8,999.98 ug kini niadto pang tuig 2013.

Si Dahino mikwestyon sa mga hintungdang departamento sa City Hall ngano sa kataas sa panahon wala kini mahatagi sa pagtagad ug miabot pa kini sa hapit upat ka tuig.

Hinuon, ang hintungdan mipasabot ngadto sa komite nga ang kalangan naggikan kaniya ug kini mapasalamaton nga nahatagan na sa dali nga aksyon. Ang maong benepisyo aduna nay pundo sumala sa sertifikasyon sa Local Finance Committee (LFC). (APD)