Salcedo nangusog matukod Cooperative Dev’t Affairs Office

Si konsehal Enrico Salcedo , chairman sa komite sa cooperatives, padayong nangusog nga maestablisar o makatukod og buhatan alang sa Kooperatiba dinhi sa syudad.

Kini pagatawgon og Cooperative Development Affairs Office diin ang katuyuan nga matutukan ang pag-atiman sa sector sa kooperatiba nga maghatag og dugang kaarangan sa mga sakop niini o’ sa mga benepesaryo.

Sa ilang sinemana nga programa sa kahanginan sa miaging Huwebes nga “Ang Konseho Karon: The Mover of Change and City’s Development”, si Salcedo mipasabot nga kini nga lakang makaayo alang sa katawhan sa syudad ug gani gilaraw na niini ang pagpalabang og ordinansa aron pagmugna sa maong buhatan aron usab maserbisyohan ang katawhan.

Sa maong higayon, gipahibalo usab sa konsehal nga sa kasamtangan, ang iyang komite padayon nga nagsuporta sa pagpahigayon og konsultasyon sa kabarangayan kalabot sa kooperatiba ingon man mga livelihood training programs nga gilantawng makatabang sa kinabag-ang katawhan ilabina sa mga kabus. (Yonggals)