P686 mil ibayad sa loteng naigo sa Carmen-Canitoan Road proj

Hiniusang giuyonan sa konseho sa syudad ubos ni bise mayor Kikang Uy ang ordinansa nga naggahin og P686,472.00 isip just compensation sa loteng naigo sa gipatumang Carmen-Canitoan Road project.

Sa sesyon sa konseho kagahapon nga gidumala ni konsehal Zaldy Ocon, gipalabang ang ordinansa nga naggahin sa nahisgotang kantidad gikan sa “Continuing Appropriation sa tuig 2013 Non-Office: Economic Services -Land Acquisition/Expropriation” aron magamit nga full payment sa loteng gipanag-iyahan sa pamilyang Go.

Mahinumduman nga sa milabayng tigom sa komite sa ways & means ni konsehal George Goking, ang mga nanag-iya sa lote mihangyo nga mauyonan ang ilang sugyot nga tax credit sa bayad sa maong lote ug sa ilang bayronon sa buhis alang sa ilang mga gipanag-iyahang kabtangan.

Buot sa mga nanag-iya sa maong lote nga ang bayad nga mobalor og P686,472.00 himuon nalang kini nga bayad sa ilang bulohisan. Apan, ang representante sa buhatan sa mamahandi sa syudad mibutyag nga ang balayronon sa tag-iya mokabat lamang sa P238 mil kapin ug sobra kaayo sa balayronon ang balor sa lote.

Taliwala nga pursigido ang mga nanag-iya nga gamitong advance payment ang maong sobra nga kantidad nga mokabat sa P400 mil kapin ka pesos, ang mamahandi sa dakbayan mipasabot nga dili kini mahimo tungod kay dili mahimong alang lang sa umaabot nga tuig ang mahimong unhan og bayad ug dili na maglakip sa sunod pang mga katuigan.

Nasayran nga ang loteng gigamit sa dakbayan alang sa walo ka metros nga proyekto sa Carmen-Canitoan road.

Ang ordinansa nga gipalabang sa konseho gipaluyohan sa komite sa panalapi ni konsehal Edna Dahino, komite sa ways and means ni konsehal Goking ug komite sa pamalaod ni konsehal Ian Mark Nacaya. (with reports from APD)