Health facility dihas Lumbia, Tablon gilantaw matukod

Hayan matukod na ang dugang hospital dinhi sa dakbayan sa Cagayan de Oro.

Kini human ang konseho sa syudad ubos ni bise mayor Kikang Uy mihatag sa katungod alang sa pagtukod og health facilities dinha sa barangay Lumbia ug Barangay Tablon.

Sa sesyon sa konseho niadtong Lunes nga gidumala ni acting vice mayor Zaldy Ocon, hiniusang gipalabang ang Ordinance No. 13304-2017 ug Ordinance No. 13305-2017 nga naghatag og panugot alang pagtukod sa maong mga fasilidad sa gitumbok nga mga barangay.

Sa iyang sulat ngadto sa konseho, si Mayor Oscar Moreno una nang miduso sa maong plano kalabot sa pagtukod sa dugang duha ka health facilities diin ang pundo alang sa pagtukod niini nasukip na sa giaprobahang budget karong tuiga.

Matod ni Mayor Moreno nga dako kaayo og ikatabang sa katawhan sa nahisgotang mga barangay ug kasikbit niining dapit ang maong fasilidad nga gitumong sa pagpalambo sa health care delivery system.

Ang ordinansa nga gipalabang sa konseho nga naghatag og katungod pagtukod sa fasilidad sa barangay Tablon gipangamahanan nila ni bise mayor Kikang Uy ug konsehal Ian Mark Nacaya, Malou Gaane, Bong Lao, Suzette Magtajas-Daba ug Eric Salcedo samtang ang ordinansa nga gipalabang nga naghatag og katungod sa pagtukod og fasilidad sa Lumbia gipangamahanan nila ni bise mayor Uy uban nila ni konsehal Zaldy Ocon, Edna Dahino, Jay Pascual, Romeo Calizo, George Goking, Annie Daba ug Reuben Daba.

Kini gipaluyohan usab sa komite sa panglawas ni konsehal Malou Gaane ug komite sa pamalaod ni konsehal Nacaya. (Yonggals)