Pagbutang og rainwater tank sa matag building constn gitun-an

Si konsehal Ian Mark Nacaya, chairman sa komite sa planning and development, padayong nagtuon sa sugyot nga i-require ang pagbutang og rainwater tank sa matag pagtukod og edifisyo dinhi sa dakbayan sa Cagayan de Oro.

Kini sa tinguha nga madaginot ang paggamit sa ilimnong tubig ug maminusan ang pagbaha dala sa kusog nga pag-ulan.

Sa milabayng tigom sa komite ni Nacaya nga gitambongan sa kadagkoan sa Office of the Building Official, City Engineering ug City Planning and Development uban sa pipila ka architects ug mga hintungdang molopyo sa dakbayan, gituki ang ordinansa sa Cebu City nga nag-require sa tanang building construction owners pagbutang og rainwater tank o’ container alang sa domestic use sa tinguha nga madaginot ang potable ground water ug maminusan ang mga insidente sa pagbaha.

Sa tigom, si OBO officer in charge Arch. Concepcion Alcantara mibutyag nga gikinahanglan ang makuting pagtuon sa maong lakang tungod kay makadugang sa galastohon sa mga building owners ang pagbutang sa maong tanke. Hinuon, matod niya dako kaayo ang madaginot sa konsumo sa mainom nga tubig kun adunay tanke nga masudlan sa tubig ulan ang matag edifisyo kay mao naman kini ang magamit sa paglaba, pagbanyo, pangbunyag sa talamnon ug uban pang gamit sa tubig pangbalay.

Niini, si Nacaya miawhag sa tanang stakeholders lakip na sa United Architects of the Philippines (UAP) –Cagayan de Oro Chapter sa paghimo og plano sa rainwater tank nga posibleng kapilian sa mga building owners.

Unta adunay hing-end, economic ug low cost nga plano alang sa daling implementasyon sa gilarawng proyekto, paglaum ni Nacaya.

Ang tigom sa komite ni Nacaya gitambongan usab ni konsehal Malou Gaane.