Suzette misugyot masusi mga parmasya nga wala nagpatuman sa 20% discount

Gikahingawa ni konsehal Suzette Magtajas-Daba, chairman sa komite sa edukasyon, ang taho nga adunay mga parmasya nga wala nagtuman o, nagsunod sa balaod kalabot sa paghatag og 20 porsyentong (20%) diskwento ngadto sa mga hamtong dinhi sa syudad.

Mao kini ang unod sa iyang special report atol sa sesyon sa konseho niadtong Lunes nga gidumala ni acting vice mayor Lordan Suan.

Matod sa konsehal nga nakasupak kini sa Section 4 sa Akta Republika 9257 kon Expanded Senior Citizens Act ug angayan lang hatagan kini sa igong pagtagad aron matunol ang patas nga kahigayonan ngadto sa mga hamtong ug makapahimulos sa hingpit sa pribilihiyo nga gihatag sa gobyerno.

Sa maong balaod, ang mga senior citizens gihatagan sa diskwento diha sa ilang pagpalit og tambal sa mga parmasya, pagsulod sa mga establisamento sama sa mga hospitals, hotels, lodging houses, restaurants ingon man funeral services.

Niini, subay sa sugyot ni konsehal Suzette, giduso ni acting vice mayor Suan ang report ngadto sa komite sa senior citizens ni konsehal Leon Gan ug komite sa commerce and trade ni konsehal George Goking. (Yonggals)