Nadya nangusog mapatuman Drug Test sa City Hall

Subling nanawagan si Konsehal Nadya Emano-Elipe, chairman sa komite sa labor, nga mapatuman sa hingpit ang lakang nga mandatory drug testing sa tanang opisyal ug kawani sa City Hall.

Kini ang unod sa iyang special atol sa regular sesyon sa konseho niadtong Lunes nga gidumala ni acting vice mayor Lordan Suan.

Ang panawagan nagsumikad sa pagkasikop sa usa ka sakop sa Roads and Traffic Administration (RTA) sa kapolisan human matod pa nag pot session sulod sa iyang panimalay sa Zone 8, Lower Bulua, ning syudad.

Matod ni Nadya nga iyang nahinumduman ang sugyot si konsehal Zaldy Ocon nga mahatagan sa gahin ang lakang aron mapatuman ang drug testing sa mga kawani sa City Hall lakip gani niini ang mga opisyal sa syudad.

Niini, nanghinaut si Nadya nga panahon na nga hingusgan sa konseho nga mapangitaan og igong pundo ang random drug testing subay usab sa resolosyon nga giduso ngadto sa Civil Service Commission.

Nunot niini, giduso ni acting vice mayor Suan ang special report ni Nadya sa komite sa police, fire and public safety ni konsehal Romeo Calizo alang sa dugang pagtuon ug rekomendasyon. (El Kapitan)