Problema sa sidewalk vendors dihas mga tunghaan giaksyonan

Sa hiniusang tigom nga gipahigayon sa kometiba sa panglawas ni konsehal Malou Gaane, komite sa edukasyon ni konsehal Suzette Magtajas-Daba, komite sa police ni konsehal Romeo Calizo ug komite sa public utilities ni konsehal Bong Lao, gihisgutan ang problema sa mga gapamaligya og pagkaon sa kadalanan ingon man sa mga sidewalk duol sa mga tunghaan.

Si konsehal Suzette Magtajas-Daba, chairman sa komite sa edukasyon, namahayag nga kinahanglan nga masulbad na ang maong problema tungod usab kay daghan ang maapektohan ilabina ang panglawas sa kabataan.

Niini, ang representante sa Department of Education (DepEd) miingon nga ang mga kantina sa mga tunghaan gidid-an na sa pagpamaligya og softdrinks ug junkfoods tungod usab kay kini makadaot sa panglawas sa kabataan.

Gipasabot ni konsehal Daba nga kinahanglan nga ang mga pagkaon nga ipamaligya limpyo busa kinahanglan nga adunay pagsusi sa mga kantina sa mga tunghaan.

Sa tigom, ang GPTA-President sa West City Central School (WCCS) misugyot nga kun mahimo aron usab makulangan ang problema sa trapiko sa maong tunghaan ang mga sidewalk vendor maoy hatagan og prayoridad nga makapamaligya sulod sa mga kantina sulod sa WCCS ug magkakuha lang sa Health Certificate nga sila angayan mamaligya sa pagkaon.