Konseho midayeg sa 3 COC-Phinma grads nga Crim Exams Topnotchers

Dako ang pagdayeg sa konseho sa syudad ubos ni bise mayor Kikang Uy sa tulo ka mga gradwado sa Cagayan de Oro College -Phinma (COC-Phinma) sa pagdala og dungog ug garbo sa dakbayan sa Cagayan de Oro.

Kini human ang tulo ka mga gradwado malampusong naka-abot sa top ten sa mga examinees nga mikuha sa Criminology Licensure Exams (CLE) sa milabayng bulan.

Sa gisagop nga resolosyon niadtong milabayng sesyon nga gidumala ni konsehal Zaldy Ocon, gidayeg ug gipasalamatan sila si Dabatian Ragasajo (6th placer), Jeanny Ann Balboa (7th placer) ug Espelita Labitad (8th placer) sa nahisgotang eksamin.

Laing resolosyon ang gisagop sa konseho nga nagpadangat og pagdayeg ug pahalipay sa COC-Phinma sa pag-umol og mga tinun-an nga ikapasigarbo sa dakbayan.

Ang duha ka resolosyon nga gisagop sa konseho alang sa maong katuyoan gipangamahanan ni konsehal Romeo Calizo, chairman sa komite sa police, fire and public safety.