Hangyo sa taga-Capisnon, Kauswagan tun-an ni Ocon

Konsiderahon sa komite sa public works ni konsehal Zaldy Ocon ang sulat nga gipadangat sa mga residente sa Capisnon, Kauswagan ning syudad.

Sila mihangyo nga matabangan nga masulbad ang problema nga kasamtangang nilang nasinati kalabot na sa pagkoral sa ilang dalan sa kanhi barangay kagawad sa barangay.

Matod sa mga residente nga ang pagkoral sa maong dalan walay panugot gikan sa barangay ug sa Office of the Building Official (OBO) ug ila usab nasayran gikan sa City Planning and Development Office nga wala gitugot ang pagkoral sa dapit nga gigahin alang sa dalan.

Gipasabot usab sa mga residente nga tungod sa maong pagkoral nalukong sila ug ilang pamilya kay wala silay igong kaagian nga bisan ang mga salakyan maglisod na sa pag-agi panahon nga adunay emerhensya.

Sila nanghinaut nga matabangan sila sa komite nga mahatagan sa kasulbaran ang ilang reklamo ug problema alang sa kaayuhan sa tanang residente.