Training workshop sa kababayen-an makatabang sa ilang kinabuhi –Dahino

Dako ang kalipay sa mga mitambong sa gipahigayong training ug seminar workshop nga gipasiugdahan sa komite sa women and family relations ni konsehal Edna Dahino.

Ang seminar nga gihimo niadtong Hunyo 30, ning tuig nga ginganlan og service training “The Surest Way To Strengthen Family Relationships” nagdala sa tema nga “Making Intentional High Value Decisions” samtang padayong nagtutok sa atensyon taliwala sa mga distraction ug kausaban.

Tumong sa maong seminar nga makat-onan sa kababayen-an ang dugang mga pamaagi sa kapanginabuhian ingon man mabungahon ug malipayon nga panimuyo.

Ang maong seminar gitambongan sa mga representante gikan sa 80 ka Barangay Women Development Council (BWDC).

Dako ang kalipay sa mga mitambong tungod sa ilang mga nakat-onang pamaagi pagpalig-on sa pamilya sa panahon sa mga kalisod ug pagsabot sa matag usa.

Ang labing unang angayan pagabuhaton sa usa ka pamilya mao ang pag-ila ug paghigugma sa Ginoo labaw sa tanang butang tungod kay ang tanan adonay kausaban sa kinabuhi, pamahayag ni Dahino.