Konseho mihangyo sa korte ihikling demolisyon sa 2 brgys

Hugot nga gihangyo sa konseho sa syudad ubos ni bise mayor Kikang Uy ang korte nga ihikling sa kasamtangan ang pagpahigayon sa demolisyon dinha sa duha ka barangay sa dakbayan.

Sa sesyon niadtong Lunes nga gidumala ni konsehal Zaldy Ocon, hiniusang gisagop ang Resolosyon nga naghangyo ni Judge Maria Luna Llena Lanticse-Saba sa Municipal Trial Court in Cities (MTCC) -Branch 5 nga ihikling una ang pagpatuman sa giluwatang Writ of Demolition sa hukom nga gipakanaug sa kasong gipasaka batok sa pipila ka mga residente sa Barangay 40.

Lakip sa gihangyo sa konseho si Judge Gil Bollozos sa Branch 20 sa Regional Trial Court nga ihikling una ang giluwatang Writ of Demolition sa umaabot Hulyo 11, 2017 dinha sa La Paz 2, Kolambog, Lapasan.

Kini aron mahatagan ang kagamhanan sa dakbayan sa igong panahon pagpahigayon og socio-economic survey sa mga apektadong residente ug matumbok ang posibleng relokasyon niini.

Ang duha ka resolosyon nga gisagop sa konseho alang sa maong katuyoan gipaluyohan sa komite sa urban poor ni konsehal Zaldy Ocon.

Dugang niini, ang konseho naghangyo ni mayor Oscar Moreno pinaagi sa City Housing and Urban Development Department (BHUDD) sa pagpahigayon og labing daling socio-economic survey ngadto sa mga residente dapit sa national highway sa barangay Patag nga maapektohan usab og demolition order.