Wala ako magbuot buot paghimo og public hearing sa casino –Ocon


Ocon

Wala ko magbuot-buot sa gipahigayong public hearing!

Mao kini ang hugot nga gibarugan ni konsehal Zaldy Ocon, chairman sa komite sa games and amusement, atol sa sesyon sa konseho niadtong Lunes nga gidumala ni bise mayor Kikang Uy.

Medyo naulawan ko kay nigawas sa lokal nga mantalaan nga nagbuot-buot lang ako og patawag og public hearing nga wala mananghid sa bise mayor.

Gipasabot niini ang paghimo og public hearing sa iyang komite nga nagdapit sa kadagkoan sa nagkadaiyang relihiyosong sektor ug mga unibersidad ug uban pang nalambigit sa academe aron mahisgutan ang aplikasyon sa Limketkai pagtukod og casino dinhi sa syudad.

Gidugang ni Ocon nga gihimo lang niya ang iyang tahas niadtong tungura isip acting bise mayor ug agig aksyon sa sulat gikan sa kadagkoan sa Limketkai and Sons Corporation.

Matod ni Ocon nga andam niyang ihatag ang chairmanship sa iyang komite aron mapadayon ang pagtuki sa maong isyu sa casino. Walay problema sa ako kay natabangan hinuon ko kay kami man tanan sa konseho, matod ni Ocon.

Mahinumduman nga ang komite ni Ocon mipatawag og public hearing niadtong milabayng bulan sa Pebrero aron pagtuki sa hangyo sa Limketkai nga ma-endorsar ang ilang aplikasyon pagtukod og casino didto sa Pagcor.

Niini, gisagop ang Resolosyon No. 12638-2017 nga nagmugna sa konseho isip committee of the whole sa panguna ni bise mayor Kikang Uy aron mopadayon pagtutok sa isyu sa aplikasyon sa Limketkai.

Malaumon si Ocon nga mopartisipar ang tanang sakop sa konseho panahon nga

mopatawag na sa dugang mga katigoman kalabot sa maong isyu. (El Kapitan)